بص يا واد يا مسيحي أولا دي المرة العشارتاشر اللي اكتب فيها الكلام ده وامسحه عشان كل مرة بزّود فيه حاجة
انا مش عارفة ليه افتكرتك دلوقتي بالذات..معرفش..بس يمكن لو كنت لسه وسطنا كنا هنبقي اصحاب اكتر ونسهر كل يوم ع القهوة مع بعض..
يمكن كمان كنت هتشاركنا أعياد ميلاد وحاجات حلوة كتير وسط الشلة..
مانا مش عارفة انساك ولا انسي ضحكتك..
بضرب نفسي مليون جزمة اني في يوم مسحت بروفايلك من عندي زي كل معارف وسط البلد وقلت مش عاوزة اشوفهم تاني..
الـ Friend request اللي بعتهولك بعدها هيفضل متعلق ومش هيكون ليه Accept ابداً !!!
مش هنسي اول يوم شفتك فيه في التيار انت والواد فيتا وقعدت اقول عليك واد متهور والواد فيتا عيل سيس
مش هنسي لما كنت بشوفك في شارع محمود بسيوني في الناحية التانية من الشارع وبنادي عليك بعلو حسي "ازيك ياواد يا مسيحي" وكنت بتجري زي المجنون تعدي الشارع من غير حتي ما تاخد بالك من العربيات وتسلم عليا وتبوسني وتقوللي "ازيك يا بت يا شيوعية" واقولك "انت مش هتستحمي بقي يا واد؟؟ " تروح مطلع المشط من شنطتك وتقوللي والله اهوه انا جاهز
مش عارفة انسي يوم ما العيال كانوا ممسوكين في مسرة واحنا واقفين عند النيابة وانت بتطبطب عليا وانا بعيط وبتقوللي "متعيطيش هخرجهوملك..مش هنسيبهم جوا"
كنت بتوقعني ضحك وانت بتقوللي "يا نانسي احنا اتكتب علينا سجايرنا تبقي واحدة" عشان تقّلب مني كام سيجارة
هيفضل رقمك هو الرقم اللي مش هيرن عليا أبداً !!
كل ما ابص علي جرافيتي ليك اقول..هنيالك ياض..كنت عاوزها ونولتها
كل ما بشوف علمك صامد كده في كل اشتباك افتكرك وانت بتجري وبتزك علي رجليك اللي فيها رصاصة ورغم كده كنت مكمل !
هفضل طول عمري فاكراك وبتفشخر في كل حتة اني كنت أعرفك..ولو جبت عيال هسمي ابني علي اسمك..يعني بص ده امر مشكوك فيه اني اخلف بس اعتبر دهوه وعد
#ملحوظة: الكلام ده مش عشان حد يعيط..افتكروا ضحكته وابتسموا
No comments:
Post a Comment