قل ادبه عليا.. ضربته بالشبشب

دي حادثة عادية جداً مش افتكاسة يعني وبتحصل في المترو بالليل في أيامنا دي..
 أبطالها: أي بنت بترجع بالليل بعد الساعة 9 وأي نطع
المكان: عربية السيدات الحمرا بدءاً من محطة الشهداء حتي محطة ثكنات المعادي
الزمان: بعد الساعة 9 
باختصار من غير رغي كتير.. 
وتوضيح: أنا مش من الفيمنستس بتوع هندافع عن عربية السيدات وخلاص.. لكن القانون بيقول كده
انهاردة كان المشهد مستفز من أول دخول المترو رصيف محطة الشهداء.. العربية الحمرا مليانة أنطاع - اللي بيقولوا عليهم رجالة يعني- وقاعدين كمان علي الكراسي وسايبين ستات كبار في السن واقفين وست شايلة طفل رضيع بيصرخ ومش عارفة تعمل ايه عشان ترضّعه..
اول مرة تقريباً اتكلم وأقول: يا أساتذة لو سمحتوا دي عربية سيدات لحد اخر اليوم
طبعاً لا حياة لمن تنادي وكأني بادن في مالطة َ
مجند جيش بيبصلي ويضحك ، واحد تاني متنحلي ، واحد تالت في الخمسين من عمره تقريباً نزل ووقفلي جنب الشباك اللي قاعدة عنده وقاللي: انت وسخة.. قلتله : شكراً ! كررها تاني.. وأنا بنفس البرود .. قرر انه يمد ايده.. مسكتها قبل ما تتمد علي وشي وتفيت عليه.. البنت اللي قدامي قفلت الشباك بسرعه فأيده فلتت..وانا في هيسترية ضحك ! معرفش ليه بس ده اللي حصل !
سكتت شوية بس لاحظت ان حوالي 60% من ستات العربية ابتدوا يتكلموا ويزعقوا.. طبعاً الرد المعتاد عليهم من نوعية: هو فيه حد قربلكوا؟ مانتوا بتركبوا معانا ، وطبعاً لازم تطلع واحدة فلوطة وتقوللي هو حد جه جنبك؟ مرورا بقي بالكلام بتاع السيدات لحد الساعة 9 بس وصولاً الي ان بعد ما المترو يقفل يقف العسكري من برا الشباك والمترو بيتحرك يقول لواحد: انت مش راجل علي فكرة عشان راكب مع الستات.. سو كيوت والله !
نيجي بقي للنطع الاخراني .. في محطة المعادي بالظبط وقف بعلو حسه وعامل فيها عتريس.. اللي بتتكلم وبتعللي صوتها تبقي مره وسخة ومش متربية.. طبعاً كل الستات زعقوا ومنهم انا.. كان رده : وانت بقي متربية بشكلك ده؟ - علي اساس اني لابسة نص كم وكدهوه بقي - رحت قايماله بس الستات حاشوني..طبعاً مش بقوم وانا ساكته.. متربية غصب عن عينك وعين التخين..لا انت اللي متربي قوي يا محترم ياللي بتقول مره ووسخة !
قمت عشان انزل المحطة اللي بعدها..وكان هو قعد جنب الشباك..وقفت جنبه.. انا بقي هوريك شغل المره.. قلعت شبشبي ومديت ايدي ضربته علي بقه.. ااه ضربته علي بقه..معرفش ايه اللي حصل بس كانت ايدي بتترعش والشبشب وقع.. لقيته في ثانية بيتحدف من الباب علي الرصيف.. كل اللي شفته ان ستات كتير ماسكينه..مش سامعة حاجة غير ضربات قلبي وصفارة المترو وشايفة من الشباك اللي جنبه ست تانية بتتخانق.. لقيت في المحطة بتاع الامن صرخت وانا بجري  : سايبين الستات بتتضرب جوا المترو وواقفين !
وعديت من المكن...
وانا ماشية مروّحة في الطريق من المحطة للبيت أفكار كتير جوايا..
 لحد امتي الست هتفضل في نظر بعض الانطاع مجرد حتة لحمة وبس؟
لحد امتي هنفضل شايفين خرق للقانون قدامنا ونسكت؟؟ (ممكن كتير يكونوا شايفين اني مزّوداها شويتين في الحتة دي بس بلاش نغالط نفسنا)
لحد امتي يا ستات لازم تستنوا واحدة تبتدي الزعيق وممكن تتضرب كمان عشان تبتدوا تتكلموا؟؟
الاخ العسكري السو كيوت مثلاً !
اللي هيقل ادبه عليا هيتضرب بالشبشب !
الشبشب مش بس هيكون وسيلة دفاعي ضد قلة الادب او التحرش.. الشبشب هيكون My Life Style !!

نسيت أقول : اهداء الي نيرفانا ملهمتي :)