وأنا صغيرة كنت خيبة قوي ، مكنتش بعرف أطيّر طيارات ورق زي بقية اصحابي .. يادوبك اخويا كان بيعمّللي "دبور" ورق بديل صغير .. 

كنت بفضل اراقب ولاد الجيران من البلكونة وهما بيطيّروا الطيارات الورق الملونة في السما.. كنت بحب أطلع فوق سطوح بيتنا واقعد علي السور – ايوة كنت بقعد علي السور ومكانش عندي فوبيا المرتفعات زي دلوقتي ! – كنت بحس اني قربت من السما ، كنت بحلم وقتها اني اطير وألف كل حتة في الدنيا زي خالي اللي كان في السعودية ومنها علي نيوزلندا ثم استراليا وخالي التاني اللي كان في المانيا ، كنت مهووسة بأدب الرحلات ، وكنت بحوّش كل شهر عشان اجيب مجلة هو وهي عشان كان فيها صفحة بتتكلم عن السفر والبلاد المختلفة..

كتير كنت بقعد في البلكونة بالليل لوحدي اتفرج علي القمر والنجوم ، كنت بالاقي نجمة لامعة جنب القمر اعتبرتها صاحبتي اللي بتونسني كل ليلة ، كنت بكلمها ! كانت اول واحدة سمعت مني اول قصة قصيرة كتبتها ودخلت بيها مسابقة المدرسة ..

نفسي ارجع زي زمان ، أحلم بعيوني المفتحين .. احلم ببكرة بتاعي ، ارجع أسافر تاني في أحلامي ، عاوزة أقوللي حاجات كتير ، العب واتنطط وافرح ، اقص شعري – الا جارسون - زي زمان ..

افضل احب الدنيا وأرجع اكتب يومياتي ومشاعري زي زمان ومبطلش كتابة ..

عارفة ان عمري ما هيطلعلي جناحات وأطير ، ولا هعرف أقعد علي سور سطح بيتنا زي زمان ..

بس هتعلم أطيّر طيارات .. هتعلم أركب عجل وأطير ع العجلة وافتح دراعاتي للهوا :)  

طب اقولكوا علي حاجة .. انا طول الوقت مش بحب المفاجآت .. وخصوصا في المناسبات زي عيد ميلادي بالذات كده . . عشان ببساطة كنت دايما بتخيل ان اللي هيعمللي مفاجأة ده هيفكر ويخطط ليها كويس .. هيفكر بكل مشاعره ووجدانه في ايه اللي هيفرحني ويفاجأني .. بس مع الاسف دايما المفاجآت كانت بتبقي أقل من سقف توقعاتي .. عشان كده بقيت دايما بصدر فكرة اني مش بحب المفاجآت لأقرب الناس ليا .. عشان لا هما يتعبوا نفسهم ولا انا يصيبني الاحباط..
لحد كام شهر فاتوا .. لحد ما لقيت مفاجآت كتيرة حلوة تسعدني من ناس بيحبوني .. ناس قرروا انهم يفكروا ويتعبوا ويشوفوا ايه اللي ممكن يبسط نانسي ويعملوه مش اللي يبسطهم هما وبعدين نانسي .. فكروا بطريقتي .. شافوا اللي قلت اني عاوزاه وعملوه وجابوه smile emoticon يمكن ده كمان حصل لما انا قررت اني to let it go ومفكرش اصلا ومهتمش ب مين عمل ايه .. ب اني مثلا شايلة تاريخ ميلادي من البروفايل ... ف اللي عارف عيد ميلادي مش محتاج ريمايندر smile emoticon
انا سعيدة وممتنة لكل حد فكر فيا ولو للحظة عشان يبسطني .. لكل حد افتكر من غير نوتيفيكشن ع الفيسبوك smile emoticon
انا تقريبا كل امنيات عيد ميلادي جاتلي grin emoticon هارد اكسترنال وصبار وورد علي الشغل وشيكولاتة وخاتم فضة وتورتة ايس كريم 

كم هو من المضحك أمركِ .. تعتقدين أن الحياة لعبة حب .. 
عزيزتي .. لم يحن موعدك للاحتفال بالانتصار الزائف بعد ، نصيحتي لك الآن أن تخلدي للراحة ..
جل ما تحتاجينه هو حصة طويلة من النوم الهادئ ..
استريحي من كلمات الحب المباعة علي الأرصفة .. أو لتستمري في طريقك نحو السراب ..
فبعض كلمات حبك كان يدخنها مع سجائره ، لتذهب بغير رجعة مع دخانها الآن ..
ما كانت أحاديثكما الا استراحة حب كانت ضرورة لكي يعيد ترتيب أوراق حبه وليلملم شتات قلبه ..
فلتعلمي يا عزيزتي انه حين يعود يري عينيها المحبة تخترقه الرعشة من شعره الي اخمص قدميه .. 
يرتجف من حب سيظل دائمًا علامة استفهامه التي لن تجيب عنها سوى كلمة عابرة في رفوف كتاباتها
يضع رأسه على صدرها ويتأمل في مسارات النجوم والشهب الهاربة من السماء .. ينصت الى موسيقي نبضات قلبها دقة دقة
لتعيدي رسم لوحاتك الناتئة الملونة بالمساحيق البلاغية ..
فللنبل آيات أخرى غير التي اصطنعتها لنفسك !