ماتجيب بوسة

*طرو ستوري :)

جلست علي سريرهما لتقرأ روايتها المفضلة..سمعت صوت الباب ..لقد حضر.

بدون حتي أن يلقي عليها السلام وبدون أية مقدمات جلس يحدثها عن مغامراته وخططه المستقبلية..

وضعت كتابها جانباً..التفتت اليه وحدقت بوجهه في اهتمام مصطنع من جانبها..سرحت في كلماته..في تعبيرات وجهه..في حركات يديه..ونطقت : "ماتجيب بوسة"

جائها الرد سريعاً وحاسماً : "مش دلوقتي"

عادت لتسرح واستمر هو في حكايته ومحاولاته المتكررة لشرح وجهة نظره اعتقاداً منه كالعادة انها لن تفهمه سريعاً كما كان يتمني.

ظلت تسرح في ملامحه وعينها صوب شفتيه طالبة بيأس : "عاوزة حضن كبير"

جائها الرد: "استني لما أخلص كلامي"

واستمر في حكاياته وخططه وشرحه بحماسة.

أما هي فكانت تسترجع بداخلها أول مرة قابلته.."كان امتي" سألت نفسها.. متعجبة كيف تمر الأيام سريعاً..

"ها ايه رأيك؟؟" أفاقت علي سؤاله مرددة "ماشي .. حلو"

ابتسم ابتسامة رضا عن انجازاته التي قد لاقت قبولاً لديها وقام متوجها الي الحمام..

"تعالي هنا" نادت عليه فالتفت بعيون متسائلة.

قالت: "ماتجيب بوسة"

شوية لماذا ع الماشي

نبتديها ب .. لماذا نقابل الأشخاص " الصح" في الوقت الخطأ ؟ والأشخاص " الغلط" في الوقت الصحيح؟؟؟

لماذا نقابل ناس مالهاش لازمة اشبه بالذباب وظيفتهم في حياتك الزن وبس؟؟؟

لماذا مثلا نقيب الممثلين ممثل فاشل؟؟ ولماذا وزير الثقافة جاهل ؟؟

لماذا حاميها حراميها؟؟

لماذا يحقق فيلم ( شارع الهرم) أعلى الإيرادات في سباق الأفلام !

لماذا هناك من يعتقد أن الأهرامات مقابر ولا يجوز زياراتها وأبو الهول أوثان !

لماذا يوجد أشكال نمطية مكررة بشكل جنوني في الحياة حتى أصبحت أرى كل مجموعة أشخاص شخص واحد فقط يحمل وجوهاً مختلفة؟؟

لماذا هناك " ناس بجحة"؟؟؟

لماذا !!!!!!!!!!

شوية ذكريات حلوة

عندي شوية أحاسيس متلخبطة كده وتخوَّف مش عارفة ليه !

كنت طول اليوم انهاردة بفتكر زمان والحاجات اللي كانت بتفرحني وتزعلني

كنت بفتكر لما كنت بلعب مع ضلي علي الارض واحرك ايدي ولما ضلي يبقي ورايا وأمشي وامد قال يعني حد ماشي ورايا

لما كنت بركب مواصلات واقعد ابص علي العربيات وابص علي الواح ارقامهم واقرا ملاكي القاهرة واشوف كام عربية مش ملاكي القاهرة وأسرح بقي في قصة صاحب ملاكي اسكندرية وليه جاي القاهرة (علي فكرة زعلت قوي لما غيروا اللوحات بحروف عشان مكنتش عارفة مين القاهرة من المحافظات التانية..بس برضه فيا نفس الداء بس المرادي بقيت بضحك علي الحروف)

فاكرة أبلة فضيلة والصحيان علي "ياحلو صبَّح يا حلو طل" كل يوم جمعة من 6 الصبح (كان ابويا بيكدرنا كل اجازة)

فاكرة الطفطف بتاع راس البر اللي ابويا اخدني فيه مرة ولفينا راس البر كلها..كان بيقنعني انه بيفسحني بس الحقيقة اننا كنا تايهين :D

فاكرة لما كنت ببص في وشوش الناس في المترو والاقي وشوش مكرمشة ووشوش بتضحك ووشوش متضايقة وعيون فيها الم كنت بحس بيهم

 فاكرة لما كنت اقعد اقرا اليفط واعلانات المحلات وكاني بتسابق اخلصهم الاول ..الحقيقة اني انا كل مكان ليه عندي ذكري بيفكرني بناس معينة وبشم ريحتهم فيه

افتكرت ازاي كان القمر وهو بدر بيفرحني وكنت بحس ان اليوم جميل ..ومازال البدر بيفرحني وبيحسسني بالسعادة .. بحس ان اليوم عيد .. ان الدنيا بترسم فرحة في وشي لدرجة اني ببقي عايزة اخرج اتفسح وقتها ولو معرفتش اخرج بدخل البلكونة.. أجيب كرسي وافرد رجلي علي سور البلكونة وراسي مرفوعة لفوق ومتنحة في القمر والنجوم

افتكرت ازاي لما كنت بشوف البحر وبغمض عنيا واسمع بس صوت الامواج ولو الدنيا شمس بحس بيها والدفا بتاعها بيوصلني

وقعدت أضحك علي نفسي قوي لما افتكرت ازاي لما كنت بتضايق بمشي في الشوارع اشكي واحكي وافضفض لنفسي وساعات كان بيبقي بصوت عالي .. ولما اضايق اكتر مش بشوف ناس بشوف لمعة فاترينات المحلات وانوار العواميد وبحبس دموعي عشان لسة حاسة بان الناس حوليا

افتكرت لما مرة كنت نازلة علي السلم ولقيت قطة قعدت اقولها متخافيش انا نازلة بس مش هاجي جمبك وزعلت اوي انها جرت برده ومتطمنتش ليا

مش عارفة ايه اللي فكرني بكل اللي انا حساة دة دلوقتي .. يمكن بسبب شوية صور رجعت اتفرج عليها .. يمكن بسبب ناس سافرت وناس بتسافر وكانهم بيودعوني ويسيبوني هنا لوحدي

مينا....

طول الوقت وأنا بضحك علي نفسي وبستعبطها...مش عايزة أنطق الحقيقة اللي أنا عارفاها كويس....عشان الحقيقة مش هتكتمل إلا لما ننطقها...وساعتها بس هنحس بالفجيعة

طول الوقت وانا بتكلم عن مينا..بس عمري ما استخدمت مفردة لغوية تفيد معنى الموت..قبل مينا..بعد مينا..يوم مينا...حاولت مرة إقول قبل استشهاد مينا..اتلجلجت كتير لدرجة اني اتلغبطت في نطق كلمة "استشهد"..مكنتش فعلا عارفه انطقها!

 لحد دلوقتي مش قادرة أسمعها من حد ولا عيني تشوفها مكتوبة..كل ماتيجي سيرته مع حد عينيا تفضل تلف في المكان واحنا بنتكلم..مع اني ممكن أكون بحكي ذكريات مبهجة عنه..عشان كل ذكرياتي معاه كانت مبهجة فعلا..كفاية ضحكته اللي كانت فعلاً بتفّرح قلبي..اول مايشوفني من بعيد يجري ويسلم عليا ويحضنني..اقوله: "ازيك يا واد يا مسيحي"؟؟ يرد: "ازيك يابت ياشيوعية"

كل اللي بعمله ده وحالة الانكار اللي انا فيها دي عمرها ما بتنفي حقيقة ان مينا مات..مات مقتول..مينا مات بقتول برصاص الجيش بتاعنا اللي جزء من ضرايبنا بيتصرف على تسليحه..الرصاصة اللي فرتكت رئة مينا وكبده ناس كتير مننا مشتركين في تمنها..

مينا اتقتل يوم أحداث ماسبيرو...مات برصاصة فرتكت اعضاؤه الداخلية..ااه الطريقة اللي مات بيها مكانتش ابشع ميته في اليوم ده..على الأقل مينا كانت جثته سليمه ظاهريا مكانش فيها عضو ناقص او مفصول زي كتير غيره من اللي دهستهم المدرعات يومها..

اللي حصل كان مأسوي ومفجع بكل المقاييس..بس إحنا للأسف مكانش عندنا وقت نحزن بشكل كافي...ماعرفناش نزعل في محمد محمود..وبقينا زي الميتين مش حاسين بأي حاجة...في حاجة ماتت فينا في ماسبيرو وحاجة تانية ماتت في محمد محمود..

يمكن الأفضل اننا نحاول دلوقت نحزن الحزن اللي ماحزناهوش عشان مانطقش من جنابنا..وأول خطوة نعملها إننا لازم نقر بالحقيقة...
وحشتني يا مينا.....

مينا صديقي مات مقتول برصاص الجيش اللي جزء من ضرايبنا بيروح لتسليحه!

البحر ..

البحر..واسع أوي… ما تشوفش اخره، بحس انه كده عشان دايماً أفتكر انه مش كل حاجة قدام عيوننا بنشوفها بالكامل..

البحر..فيه سمك صغير ياكله سمك كبير، واحنا بناكل ده وده… ولا عمر السمك الصغير خلص رغم ضعفه، ولا عمر السمك الكبير نجا من الصيد رغم قوته… بحس انه عشان لازم دايماً نفتكر ان الكون ده له نظام..

البحر.. فيه الموجة تجي تضرب في الموجة، تشوفها من بعيد كبيرة وسريعة، ساعات بخاف منها قوي… بس كل ما تقرب مني بتصغر، بيحسسني دايماً إن اللي خايفة منه وهو بعيد، هيكون أهون بكتير لما يقرّب مننا..

البحر.. فيه أسماك معينة بتهاجر المحيط… السمك يوصل كل موسم، من غير ما يتوه، في نفس الوقت من كل سنة من غير ما يتغلبط، لا معاه منبه ولا خريطة… يجوز عشان نتأكد إنه كل طريق مكتوب لنا هنوصله حتى لو افتكرنا اننا مش هنقدر..

البحر.. حاجة مفرحة ليّا  وقت المصيف، حاجة مخيفة ليّا أحيانا، يمكن عشان مافيش حاجة حلوة تماما ولا ووحشة تماما …

                وسط البحر صخر، يضربه الموج ويفضل صخر… الموج بياخد منه، لكن بيفضل صخر