مش ملحدة بس بحترمهم !

عزيزي اللي بتقرا النوت دي :

أكيد بتسأل نفسك أنا بكتب النوت دي ليه
أكيد مش عشان سواد عيونك .. لأن محدش ليه دعوة باتجاهاتي الدينية أو الشخصية والفكرية..

يبقي هتسألني برضه انا بكتبها ليه !

أقولك :

عشان قرفت .. زهقت من ملاحقة وترصد الناس ليا ..
زهقت من الأسئلة اللي في عيون كل الناس اللي اعرفهم ..
ملحدة .. سافرة .. عاهرة .. سابت المسيح .. عيارها فالت .. ايوالله هما بيقولوا كده في ضهري
مش مشكلتني اني قررت اعبد ربنا (لو موجود) بطريقتي ..
مش مشكلتي اني شفت في مجتمعي الكنسي الكذب والرياء والمحسوبية فقررت اني ابعد ..
ااه ليا ذكريات كتيرة حلوة فيه .. بس ليا ذكريات وحشة اكتر واكتر ..
ليا ذكريات مع أصدقاء وخدام في الخدمة والخروجات والمؤتمرات والعمل الجماعي ، وليا ذكريات برضه مع خدام طلبوا انهم يناموا معايا بما اني متحررة بقي وكيدهوه !!
يمكن بدأت مشكلتي من زمان قوي .. كانوا بيقولوا عليا شعلة نشاط .. عارف انت الخدام اللي بيتواجدوا في الكنيسة 48 ساعة في الـ 24 ساعة دول؟؟ ايوة كنت أنا ! كان اي حد بيطلب نشاط كنت بعمله ، كل الناس عارفة اني Active لحد ما بقيت احس ان مثلاً أمين المرحلة بيضغط عشان أشتغل عشان يتقال أن أستاذ فلان الأمين مرحلته من أنشط المراحل في الكنيسة .. بيضغط عشان يتقال عليه ان مرحلته نشيطة .. مش مهم بقي الضغط النفسي اللي عليا وعلي غيري من الخدام ، لكن هو .. مرحلته لازم تبقي نشيطة ! ولا كأننا في شغل !


نيجي بقي للنشاط السياسي:

زوار الفجر !!

او بمعني أدق : زوار الثامنة صباحاً !!

يوم 5 يناير 2011 .. خادم وكاهن يخبطوا عليك الساعة 8 صباحاً !! اصل ده الوقت الوحيد اللي يعرفوا يقفشوك فيه في البيت !

س : كنتِ فين يوم 3 يناير بالليل؟!
ج : كنت في شبرا.
س : بتعملي ايه هناك ؟
ج : كنت في مظاهرة
س : وبتعملي ايه في المظاهرة؟ انت مش عارفة ان اللي بيعملوا المظاهرات دول بتوع 6 ابريل وكفاية الجواسيس؟
ج : (ابتسامة صفراء)
س : انت مش عارفة ان قداسة البابا مانع الناس تنزل في المظاهرات؟
ج : يعني لا حل ولا بركة؟
س : (صمت لمدة ثواني) نانسي لو في ايدك عصاية سحرية تتمني ايه؟
ج : تسيبوني في حالي ! عن اذنكم لازم اكمل نومي !

نيجي بقي لمرحلة الـ Screen Shots

س : ازاي يا نانسي تكتبي في مرة : "اسماعيل الشاعر رجع بيته في المعادي ، احنا هنتفشخ" ؟؟!!
ج : عارف حضرتك ان ابونا مرقس كاهن كنيسة مارمرقس في مرة قال في العظة: وداود طلع عليه اسد ودب راح فاشخ الاسد نصين؟!
س : مش كل شوية حد هيبعتلي يقوللي الحق شوف نانسي كاتبة ايه .. تحبي اوريلك علي الايميل عندي كمية الصور من الحاجات اللي بتكتبيها؟

مرحلة تشغيل الدماغ
اي سؤال بسأله او ببتدي افكر فيه بيتقابل بهجوم وكلام من نوعية ربنا يهديكي وما الي ذلك كأن عشان تكون مؤمن حرام عليك تشغل دماغك ، عارف ليه؟ عشان لو شغلت دماغك مش هتلاقي اجابات ، وهو ده الدين .. معندوش اجابات لتساؤلاتك .. تؤمن وانت مغمض ! اصل ربنا كبير قد البحر ، جرب كده تملا مية البحر في جردل .. مش هتعرف !!
طب جبل المقطم اتنقل فعلا؟؟ طب بتتريقوا علي المسلمين ليه لما بيصدقوا في البراق ما ايليا صعد للسما في مركبة نارية !! ليه ربنا حرم الجنس ؟!

تلاقي واحدة فلوطة (كان يقال عليها ان مفيش حد في كنيستنا معداش عليها لحد ما ربك هداها واتجوزت)* تقوللك انا مش عارفة انتِ بتقعدي مع مين بيملا دماغك بالكلام ده 

في خلال سنة اذكر اني دخلت كنيستي مرتين بالظبط : يوم أحد السعف 2013 ويوم قداس عيد الميلاد 2014 ، طول الوقت وانا بصلي في المرتين دول كنت بلاقي الناس بتبصلي ، مستغربين مثلا اني  بصلي ! فاكرين اني ملحدة وشايفة في عيونهم سؤال: هي ايه اللي جابها !
حسيت كأني كائن فضائي !

زوّد عندك سيناريو النقد المستمر لكل التصرفات ليل ونهار ، غير بقي ان يطلعلك أمين خدمة قرر بين يوم وليلة انه يبقي ابوك (اكمن اني يتيمة بقي وكيدهوه)
وهاتك يا تليفونات ورسايل
الناس دي بتجيب العشم ده منين؟
ليه الاصرار علي التدخل في حياة البني ادمين بالشكل ده والمبرر اصلها خروف ضال وبعد عن الكنيسة !! 
وانت مال سيادتك؟ !!! هو ربنا ده هيحاسبني انا ولا هيحاسب سيادتك؟!!

ملحدة؟
عشان الناس تتبط ونخلص من قرفهم .. لا يا سيدي مش متنيلة !
بس مش معني كده اني مؤمنة بكل حاجة !
ايوالله زي ما بقولك كده ..
اعتقادي الداخلي بيقول انه موجود (ماهو الانسان بفطرته متأكد ان فيه خالق للكون لحد ما يقرر يفكر )
موجود .. بس فوق !
فوق في السما وبيتفرج علينا
اتفرج علي The Truman Show  كده وانت تفهم قصدي ايه




حقيقي انا وصلت لحد هنا ومش عارفة اكمل النوت دي
ممكن تكون شايفني متشائمة ومليش حق اني اتكلم كده
بس انا فعلا تعبت من تدخل الناس في حياتي
انا معرفش انا بكتب ده ليه دلوقتي ! بس حسيت ان عندي رغبة في الكلام والكتابة .. 


جاري تحديث النوت دي كل شوية 

* ملحوظة : اكيد انا مش ضد ان سيادتها يكون عندها علاقات ، لكني بحاول اقيس الموضوع بمكيالها هي !