وأنا صغيرة كنت خيبة قوي ، مكنتش بعرف أطيّر طيارات ورق زي بقية اصحابي .. يادوبك اخويا كان بيعمّللي "دبور" ورق بديل صغير .. 

كنت بفضل اراقب ولاد الجيران من البلكونة وهما بيطيّروا الطيارات الورق الملونة في السما.. كنت بحب أطلع فوق سطوح بيتنا واقعد علي السور – ايوة كنت بقعد علي السور ومكانش عندي فوبيا المرتفعات زي دلوقتي ! – كنت بحس اني قربت من السما ، كنت بحلم وقتها اني اطير وألف كل حتة في الدنيا زي خالي اللي كان في السعودية ومنها علي نيوزلندا ثم استراليا وخالي التاني اللي كان في المانيا ، كنت مهووسة بأدب الرحلات ، وكنت بحوّش كل شهر عشان اجيب مجلة هو وهي عشان كان فيها صفحة بتتكلم عن السفر والبلاد المختلفة..

كتير كنت بقعد في البلكونة بالليل لوحدي اتفرج علي القمر والنجوم ، كنت بالاقي نجمة لامعة جنب القمر اعتبرتها صاحبتي اللي بتونسني كل ليلة ، كنت بكلمها ! كانت اول واحدة سمعت مني اول قصة قصيرة كتبتها ودخلت بيها مسابقة المدرسة ..

نفسي ارجع زي زمان ، أحلم بعيوني المفتحين .. احلم ببكرة بتاعي ، ارجع أسافر تاني في أحلامي ، عاوزة أقوللي حاجات كتير ، العب واتنطط وافرح ، اقص شعري – الا جارسون - زي زمان ..

افضل احب الدنيا وأرجع اكتب يومياتي ومشاعري زي زمان ومبطلش كتابة ..

عارفة ان عمري ما هيطلعلي جناحات وأطير ، ولا هعرف أقعد علي سور سطح بيتنا زي زمان ..

بس هتعلم أطيّر طيارات .. هتعلم أركب عجل وأطير ع العجلة وافتح دراعاتي للهوا :)